काठमाण्डौ । लघुवित्त संस्थाहरुले गत आर्थिक वर्ष २०८२–८३ मा मनग्य नाफा कमाएका छन् । ५० लघुवित्त संस्थाले गत आवमा १२ अर्ब २ करोड ४३ लाख रुपैयाँ नाफा कमाएका छन् ।

यो नाफा अघिल्लो आर्थिक वर्षको तुलनामा १५३.११ प्रतिशत बढी हो । अघिल्लो आवमा लघुवित्त संस्थाहरुले ४ अर्ब ७५ करोड ६ लाख रुपैयाँ नाफा कमाएका थिए ।

गत आर्थिक वर्षमा सबै लघुवित्त नाफामा उक्लिएका छन् । सबैको वितरणयोग्य मुनाफामा पनि उल्लेख्य सुधार देखिएको छ । वित्तीय विवरणअनुसार १९ लघुवित्तको लाभांश क्षमता २५ प्रतिशत भन्दा माथि छ, तर नेपाल राष्ट्र बैंकको व्यवस्थाबमोजिम भने जम्मा ३ संस्थाले मात्रै २५ प्रतिशत लाभांश दिन सक्नेछन् ।

लघुवित्त संस्थाहरुले लाभांश घोषणा गर्दा लाभांश वितरणपछिको पूँजीकोष अनुपात तथा पछिल्लो असार मसान्तको निष्क्रिय कर्जा अनुपात (एनपीएल)लाई आधार मानेर राष्ट्र बैंकले तोकेको सीमाभित्र रही लाभांश वितरण गर्नुपर्नेछ ।

जसबमोजिम ५ प्रतिशतभन्दा थोरै एनपीएल भएका संस्थाहरुले १२ प्रतिशतभन्दा बढी पुँजीकोष अनुपात भएमा मात्रै २५ प्रतिशत लाभांश वितरण गर्न पाउनेछन् ।

साथै, ५ प्रतिशत एनपीएल भएका लघुवित्तहरुको १० देखि १२ प्रतिशतसम्म पूँजीकोष भएमा २० प्रतिशत र ८ देखि १० प्रतिशत पुँजीकोष भएमा १५ प्रतिशत लाभांश वितरण गर्न पाउने व्यवस्था छ ।

यता ५ देखि १० प्रतिशत एनपीएल भएका संस्थाहरुको हकमा १२ प्रतिशत पुँजीकोष भएमा २० प्रतिशत लाभांश, १० देखि १२ प्रतिशतसम्म पुँजीकोष भएमा १५ प्रतिशत र ८–१० प्रतिशतसम्म पुँजीकोष भएमा १० प्रतिशत लाभांश वितरण गर्न पाउने व्यवस्था केन्द्रीय बैंकले गरेको छ ।

त्यस्तै, १० देखि १५ प्रतिशतसम्म एनपीएल रहेका संस्थाहरुको हकमा भने १२ प्रतिशत पुँजीकोष भएमा १५ प्रतिशत, १० देखि १२ प्रतिशत पुँजीकोष भएमा १० प्रतिशत र ८ देखि १० प्रतिशतसम्म पुुँजीकोष भएमा ५ प्रतिशत मात्रै लाभांश वितरण गर्न पाइनेछ ।

साथै गत आवको असार मसान्तसम्ममा १५ प्रतिशतभन्दा बढी एनपीएल रहेका संस्थाहरुले भने कुनै खालको लाभांश बाँड्न नपाउने राष्ट्र बैंकको नियम छ । त्यस्ता संस्थाहरुको पुँजीकोष अनुपात जतिसुकै भएपनि एनपीएल कायम गर्न नसक्ने लघुवित्तहरुले कुनै खालको लाभांश वितरण गर्न नपाउने राष्ट्र बैंकले जनाएको छ ।

२५ प्रतिशत लाभांश दिन ३ संस्था मात्रै योग्य  

राष्ट्र बैंकका अनुसार खराब कर्जा अनुपात र पुँजीकोष अनुपातको आधारमा २५ प्रतिशत लाभांश बाँड्न पाउने संस्थाहरु ५ मात्रै छन् ।

तर यी संस्थाहरुले वित्तीय विवरणमा छुट्याएको वितरणयोग्य मुनाफाको आधारमा भने तीन संस्था मात्रै २५ प्रतिशत लाभांश बाँड्न योग्य देखिएका छन् ।

जसमा छिमेक लघुवित्त, साना किसान लघुवित्त र नेशनल  लघुवित्त रहेका छन् ।