आफूलाई पार्टीका नियमित कामहरूबाट अलग राखेर वरिष्ठ उपसभापति र महामन्त्रीहरूले पार्टीको दैनिकी हेर्ने व्यवस्था गर्ने योजना रहेको थापाले सुनाए। आफू भने देशभर घुम्ने र नागरिकका कुरा सुन्ने बताएका छन्। कुनै पनि नेता वा कार्यकर्ताको निजी जीवनका गतिविधि र आचरणका लागि पार्टीलाई जिम्मेवार बनाउन नहुने जिकिर उनले गरे।

सो क्रममा बोल्दै थापाले भने, ‘नेपाली कांग्रेसले आजको समाजका आवश्यकता, जनताका प्रश्न र समसामयिक मुद्दाहरूलाई सम्बोधन गर्दै अघि बढ्नुपर्छ। सामाजिक सञ्जालमा मात्र केन्द्रित नभई छलफल, बहस र चिन्तनमार्फत समस्याको समाधान खोज्नुपर्छ।’

नागरिकका आकाङ्क्षा पूरा गर्न आफूलाई पार्टीका नियमित कामभन्दा बाहिर रहेर देशभरिका नेता, कार्यकर्ता र नागरिकसँग भेटघाट गर्ने तथा उनीहरूका कुरा सुन्ने अवसर दिनुपर्ने उनको भनाइ थियो।

पार्टीका सदस्यको व्यक्तिगत आचरण र आर्थिक पारदर्शिताको जिम्मेवारी सम्बन्धित व्यक्तिले नै लिनुपर्ने भन्दै कसैको व्यक्तिगत कमजोरीको दोष पार्टीले बोक्नु नहुने उनले बताए। सञ्चारमाध्यमहरूलाई पनि आग्रह गर्दै उनले कुनै व्यक्तिको व्यक्तिगत कमजोरी जोडेर सिङ्गो पार्टीलाई नै दोषी नठहराउन अनुरोध गरे।

यसैगरी सभापति थापाले पार्टीभित्रको आन्तरिक प्रतिस्पर्धामा पराजित वा छुटेका योग्य नेतृत्वलाई समेटेर अघि बढ्ने प्रतिबद्धता जनाए। पार्टीको आन्तरिक निर्वाचनलाई जित र हारको अन्तिम मानकका रूपमा नहेर्न आग्रह गर्दै उनले छुटेका साथीहरूलाई समेटेर सामूहिक नेतृत्व र सहकार्यका साथ पार्टीलाई अगाडि बढाउने बताए। पार्टीभित्रको एकता नै अहिलेको मुख्य आवश्यकता रहेको भन्दै उनले गुटगत प्रभावभन्दा माथि उठेर काम गर्ने सङ्केत गरे।