आगामी मध्यावधि निर्वाचनअघि रिपब्लिकन पार्टीको पहिलो सम्मेलनमा सहभागी हुन टेक्सास पुगेको बेलामा ट्रम्पको यी अभिव्यक्ति आएका हुन् । नोभेम्बरमा हुने निर्वाचनले अमेरिकी प्रतिनिधिसभा र सिनेटमा रिपब्लिकनको नियन्त्रण कायम रहने वा डेमोक्र्याटले शक्ति फिर्ता लिने भन्ने निर्धारण गर्नेछ । यसैबीच, इरानसँगको युद्धलाई लिएर ट्रम्पमाथि आफ्नै रिपब्लिकन पार्टीभित्रबाट समेत दबाब बढिरहेको छ । युद्धका कारण इन्धनदेखि खाद्यान्नसम्मको मूल्य बढेपछि ट्रम्पको लोकप्रियता घटिरहेको विभिन्न सर्वेक्षणले देखाएका छन् ।

ट्रम्पले यसअघि इरानसँगको युद्ध केही सातामै समाप्त हुने अनुमान गरेका थिए । तर युद्ध सातौँ महिनामा प्रवेश गरिसकेको छ । पछिल्ला दिनमा मध्यपूर्वमा लडाइँ झनै तीव्र बनेको छ । बुधबार अमेरिकी सेनाले इरानसँग सम्बन्धित पाँचवटा तेल ट्यांकरमाथि आक्रमण गरेको थियो । त्यसको जवाफमा इरानले स्ट्रेट अफ होर्मुजमा दुई अमेरिकी नौसैनिक विध्वंसक जहाज र आठवटा तेल ट्यांकरमाथि आक्रमण गरेको इरानी सरकारी सञ्चारमाध्यमले दाबी गरेको छ । ती आक्रमणबाट जहाजहरूमा ठूलो क्षति पुगेको बताइएको छ ।