स्थानीय स्वास्थ्यकर्मीका अनुसार ठूलो संख्यामा विद्यार्थीहरू धुवाँका कारण निसास्सिएका थिए । एक स्थानीय क्लिनिकका नर्स क्रिस्टोफ जिगाशानेले आफ्नो स्वास्थ्य केन्द्रमा शिक्षकसहित करिब ५० विद्यार्थीलाई गम्भीर अवस्थामा ल्याइएको बताएका छन् । उनका अनुसार केहीको घटनास्थलमै मृत्यु भएको थियो भने केहीको अस्पतालमा उपचारका क्रममा ज्यान गएको थियो ।

एएफसी/एम२३ का प्रवक्ता कान्युकाका अनुसार आगलागीपछि २९ जना घाइतेको स्थानीय स्वास्थ्य संस्थामा उपचार भइरहेको छ । तीमध्ये २१ जनालाई सघन उपचार कक्षमा राखिएको छ । गम्भीर घाइतेमध्ये १७ जनाको कादुतु जनरल अस्पताल र चार जनाको बुकाभु प्रान्तीय जनरल अस्पतालमा उपचार भइरहेको बताइएको छ । आगलागीको कारण भने अहिलेसम्म स्पष्ट भएको छैन । स्थानीय सञ्चारमाध्यमहरूले मृतकको संख्या प्रारम्भिक रहेको र उद्धार तथा खोजी कार्य जारी रहेकाले संख्या अझै बढ्न सक्ने बताएका छन् ।

आगलागी नियन्त्रणका लागि आपत्कालीन उद्धार टोली परिचालन गरिएको एएफसी/एम२३ ले जनाएको छ । समूहले प्रभावित परिवारलाई सहयोग उपलब्ध गराउने बताउँदै घटनापछि शान्त रहन र एकअर्कालाई सहयोग गर्न अपिल गरेको छ । बुकाभु पूर्वी डीआर कंगोको दक्षिण किभु प्रान्तको राजधानी हो । खनिज स्रोतले सम्पन्न पूर्वी कंगोमा लामो समयदेखि सशस्त्र द्वन्द्व जारी छ। रुवान्डाको समर्थन रहेको आरोप लाग्दै आएको एएफसी/एम२३ समूहले सन् २०२५ को फेब्रुअरीदेखि बुकाभु सहरमाथि नियन्त्रण कायम गर्दै आएको छ ।