राति अबेर धनगढी पुग्ने आन्तरिक तथा बाह्य पर्यटक, हवाई यात्रु र लामो दूरीका यात्रुलाई खाना तथा आवासको सुविधा लिन सहज होस् भन्ने उद्देश्यले समय थप गरिएको होटल व्यवसायी संघले जनाएको छ।

संघका अध्यक्ष पाण्डेयले नयाँ व्यवस्थाले राति अबेर धनगढी पुग्ने यात्रु तथा पर्यटकलाई होटलको सेवा लिन सहज हुने बताए। यसबाट धनगढीमा पर्यटकको बसाइ लम्ब्याउन तथा होटल र पर्यटन व्यवसायलाई सहयोग पुग्ने अपेक्षा गरिएको उनको भनाइ छ।

राति १२ बजेसम्म सञ्चालन गर्न पाउने सुविधा प्रदेश सरकारको मापदण्डअनुसार दर्ता भएका स्तरीय होटलका लागि मात्र लागू हुनेछ। अन्य होटल तथा व्यापारिक प्रतिष्ठानका लागि राति १० बजेसम्मको समयसीमा यथावत् रहनेछ।

सम्झौतापछि प्रशासनले होटल सञ्चालकलाई रातिको समयमा सुरक्षा व्यवस्थामा विशेष ध्यान दिन आग्रह गरेको छ। ग्राहकको विवरण राख्ने, होटल परिसरको निगरानी गर्ने तथा आवश्यक सुरक्षा प्रबन्ध मिलाउने जिम्मेवारी होटल सञ्चालकको हुने प्रशासनले जनाएको छ।