काठमाडौं । सेयर लगानीकर्ता दिपेन्द्र अग्रवालले पूँजीबजारमा लगानी गर्ने ठूलो संख्याका लगानीकर्ताको आम्दानी तथा लगानीको स्रोतबारे गम्भीर प्रश्न उठाएका छन् ।
अग्रवालले सामाजिक सञ्जालमार्फत आफ्नो धारणा सार्वजनिक गर्दै आफूले कमाएको प्रत्येक रुपैयाँ शुद्ध तथा वैध स्रोतबाट आर्जन गरेको दाबी गरेका छन् । उनले आफूले कमाएको रकमको स्रोत पुष्टि गर्ने प्रमाणसमेत आफूसँग रहेको बताएका छन् ।
उनले लेखेका छन्, ‘मैले कमाको एक–एक रुपैयाँ शुद्ध छ र वैध स्रोतबाट आय आर्जन गरिएको छ ! मसँग त हरेक रुपैयाँ कमाएको प्रमाण पनि छ । तर यदि ८० लाख लगानीकर्ताहरूसँग बजारमा लगानी गरेको स्रोत खोजियो भने कति जनाले आफ्नो स्रोत देखाउन सक्छन् ?’
अग्रवालको यो भनाइले नेपालको पूँजीबजारमा लगानीकर्ताको संख्या बढ्दै जाँदा उनीहरूले बजारमा लगानी गरेको रकमको स्रोत तथा त्यसको वैधतासम्बन्धी विषयलाई पुनः बहसमा ल्याएको छ ।
उनको प्रश्नले विशेषगरी ठूलो संख्यामा रहेका खुद्रा लगानीकर्ताको लगानीको स्रोत पहिचान, सम्पत्तिको वैधता तथा नियामकीय व्यवस्थाका विषयमा सरोकारवालाबीच थप छलफल आवश्यक रहेको संकेत गरेको छ ।
नेपालको पूँजीबजारमा लाखौं लगानीकर्ता सहभागी रहँदा लगानीकर्तामैत्री व्यवस्था र सम्पत्तिको स्रोतसम्बन्धी नियमनबीच सन्तुलन कायम गर्ने विषय महत्वपूर्ण बन्दै गएको छ । अग्रवालको अभिव्यक्तिले पनि लगानीकर्ताको स्रोत पहिचान गर्दा व्यवहारिकता, पारदर्शिता र समान नियमनको विषयमा प्रश्न उठाएको देखिन्छ ।
