यस्ता छन् आङदेम्बेले उठाएका मुख्य विषयहरू

• सडक र पुल निर्माण: रसुवा, नुवाकोट र धादिङका अवरुद्ध सडक सफा गरी तत्काल आवागमन सुचारु गर्न आग्रह गरिएको छ। साथै, बाढीबाट क्षतिग्रस्त १९ भन्दा बढी पुलमध्ये तत्काल कम्तीमा ७ स्थानमा बेलिब्रिज जडान गर्न सरकारसँग माग गरिएको छ।
• अन्तर्राष्ट्रिय उद्धार टोली र ड्रोनको प्रयोग: सुरुङ, भग्नावशेष वा अन्य स्थानमा नागरिक फसेको सम्भावना रहेकाले उनीहरूको जीवितै उद्धारका लागि आवश्यकताअनुसार अन्तर्राष्ट्रिय उद्धारकर्ता तथा विशेषज्ञको सहयोग लिन आग्रह गरिएको छ। त्यस्तै, त्रिशूली नदी क्षेत्रमा खोजी कार्यका लागि ड्रोनको व्यवस्था गर्न समेत सुझाइएको छ।
• घाइतेको उपचार र यातायात: सुरक्षित स्थानमा ल्याइएका नागरिकलाई आवश्यकताअनुसार काठमाडौंसम्म पुर्‍याउने यातायातको व्यवस्था गर्नुपर्ने माग पत्रमा छ। नुवाकोट जिल्ला आयुर्वेद केन्द्रमा रहेका घाइते तथा ज्येष्ठ नागरिकको उपचारका लागि आवश्यक अक्सिजन, औषधि र स्वास्थ्यकर्मीको व्यवस्था गर्न तथा पर्याप्त शय्या उपलब्ध गराउन ध्यानाकर्षण गराइएको छ।
• शव व्यवस्थापन तथा सञ्चार: बाढीले बगाएर ल्याएका शवहरू यत्रतत्र रहेको भन्दै बेपत्ताको खोजी र शव व्यवस्थापन तीव्र पार्न स्थलगत खोज तथा उद्धार टोली परिचालन गर्नुपर्ने उल्लेख छ। साथै, उद्धार तथा राहत कार्य सहज बनाउन अवरुद्ध विद्युत् र सञ्चार सेवा तत्काल सुचारु गर्न माग गरिएको छ।