काठमाडौँ । प्रधानमन्त्री बालेन्द्र शाहले मुलुकमा भ्रष्टाचार र दण्डहीनताको जरा गहिरो रहेको बताएका छन्।

संविधान दिवसको अवसरमा टुँडिखेलमा आयोजित समारोहलाई सम्बोधन गर्दै उनले भ्रष्टाचारको जरो उखेल्ने हातहरू अब झनै बलिया र धेरै भएको बताएका हुन् ।विकासका लागि सुशासन अनिवार्य पूर्वसर्त भएको कुरामा सरकार सचेत रहेको उनको भनाइ छ। वर्तमान सरकारले सुशासन कायम गर्न प्रशासनिक संरचनाको उपयुक्त आकार निर्धारण, भ्रष्टाचारविरुद्ध शून्य सहनशीलता, प्रशासन यन्त्रमा राजनीतिक तटस्थता र सार्वजनिक पदमा योग्यताका आधारमा नियुक्ति प्रक्रिया अवलम्बन गरेको शाहले स्पष्ट पारे। ‘भ्रष्टाचार र दण्डहीनताको जरो गहिरो छ’, प्रधानमन्त्री शाहले भने, ‘तर यो जरो उखेल्ने हातहरू अब झन् बलिया र धेरै छन्।’

सुशासन नारा मात्र नभएर काम भएको भन्दै उनले सरकार सोहीअनुसार अघि बढिरहेको उल्लेख गरे। सङ्घ, प्रदेश र स्थानीय तहबिच सहकारिता, सहअस्तित्व र समन्वयका आधारमा राष्ट्र विकासको साझा उद्देश्य प्राप्त गर्न सरकार प्रतिबद्ध रहेको उनले बताए। आफूहरू पुरानै बाटोमा नहिँड्ने उनको दाबी छ।

प्रविधिको प्रयोगमार्फत सुशासन कायम गर्नेतर्फ सरकारको ध्यान केन्द्रित रहेको प्रधानमन्त्री शाहले बताए। ‘कृत्रिम बुद्धिमत्ता, डिजिटल प्रविधि र साइबर सुरक्षालाई सँगै लिएर नवप्रवर्तन र स्टार्टअपलाई अगाडि राखेर हामी ज्ञानमा आधारित अर्थतन्त्र निर्माण गर्दैछौँ’, उनले भने, ‘डिजिटल सुशासन ब्लुप्रिन्टअनुसारको राष्ट्रिय डिजिटल पूर्वाधार त्यसैको जग हो।’ सडकमा युवाले मागेको सुशासन सरकारले प्रविधिबाट पनि सुनिश्चित गर्ने उनले दाबी गरे।

हालै रसुवा र भोटेकोसीमा बाढीले पुर्‍याएको क्षति अकल्पनीय रहेको भन्दै उनले विपद् उद्धार तथा राहतमा सहयोग गर्ने सबैप्रति आभार प्रकट गरे। धन्यवाद मात्र पर्याप्त नहुने भन्दै उनले विपद् व्यवस्थापनमा पूर्वतयारी अपनाइने बताए।

‘नेपाल विश्वको उच्च विपद् जोखिममा भएका मुलुकहरूको सूचीमा छ’, शाहले भने, ‘यो तथ्यलाई हामी विपद् आइसकेपछि होइन, आउनुअघि नै सामना गर्छौँ।’ जोखिम न्यूनीकरण र पूर्वतयारीमा विशेष जोड दिइने भन्दै उनले विपद् पूर्वसूचना प्रणाली सर्वोच्च प्राथमिकताका साथ कार्यान्वयनमा ल्याइने जानकारी दिए।

संविधानको अक्षर र भावना दुवैप्रति वर्तमान सरकार पूर्ण रूपमा प्रतिबद्ध रहेको प्रधानमन्त्री शाहले स्पष्ट पारे। संविधानले नेपाली जनतासँग विविधताबिचको एकता, सबै प्रकारका विभेद र असमानताको अन्त्य गर्दै समतामूलक समाज निर्माणको वाचा गरेको उनले स्मरण गराए।

प्रतिस्पर्धी बहुदलीय लोकतन्त्र, मानव अधिकार र कानुनी राज्य सर्त नभएर राष्ट्रिय जीवनको आधार भएको उनले बताए। ‘संविधान जति राम्रो भए पनि त्यसलाई चलाउने हात इमानदार र अनवरत क्रियाशील भएनन् भने त्यो एउटा कागज मात्र बन्नेछ’, उनले भने, ‘म प्रस्ट भन्छु, यो सुरुवात हो, अन्त्य होइन।’

संविधान जारी भएको दिन हरेक वर्ष आउने तर संविधान पूरा हुने दिन आफैँले ल्याउनुपर्नेमा उनले जोड दिए। हरेक इमानदार निर्णय र पारदर्शी नियुक्तिबाट मात्र नागरिकको घरदैलोमा पुग्न सकिने उनको विश्वास छ। ‘जनताले सुशासन मागेका छन्, विकास मागेका छन्’, शाहले भने, ‘समृद्धि र सामाजिक न्याय मागेका छन् र यो सरकारको हरेक कदम त्यही आकाङ्क्षातर्फ केन्द्रित छ।’

सहिदहरूको रगतले लेखेको संविधान कामबाटै पूरा गर्ने प्रतिबद्धता उनले जनाए। संविधानप्रतिको निष्ठा र यसको पालनामा आफूहरू प्रतिबद्ध रहेको भन्दै उनले सरकारले चालेका कदमहरू अन्त्य नभएर सुरुवात मात्र भएको प्रस्ट पारे।