काठमाडौं । पोखरा भ्रमणमा रहेको भुटान क्रिकेट टोलीमाथि घरेलु टोली गण्डकी प्रदेशले लगातार दोस्रो जित निकालेको छ ।
पोखरा रंगशालास्थित क्रिकेट मैदानमा बुधबार भएको खेलमा गण्डकीले भुटानलाई ६४ रनले पराजित गर्यो । यसअघि मंगलबार भएको पहिलो अभ्यास खेलमा गण्डकीले भुटानलाई ८ विकेटले पराजित गरेको थियो ।
गण्डकीले दिएको १९७ रनको लक्ष्य पछ्याएको भुटान १७ ओभर ४ बलमा १३२ रनमा समेटियो । भुटानका लागि सोनाम चोपेलले सर्वाधिक ४३ रन बनाएपनि जितका लागि पर्याप्त हुन सकेन ।
ताशी दोर्जीले ३१, तेन्जिन राब्गेले २१, नामगाङ चोजेले ६, नाम्गे थिन्लेले १, रञ्जुङ मिक्यो दोर्जीले २, थिन्ले जम्त्सोले १७, ताशी चोपेलले ४ रनको योगदान दिँदा गाकुल कुमार घाले र ताशी फुन्छोले कुनै पनि रन बनाउन सकेनन् । सोनाम येशे एक रनमा अविजित रहे ।
बलिङमा गण्डकीका कप्तान विपिन खत्रीले सर्वाधिक ४ विकेट लिए । उनले ३ ओभर ४ बलमा २२ रन खर्चिए । दीपककुमार डुम्रेले ३, सिव्रिन श्रेष्ठले २ र सन्दीप खत्री क्षेत्रीले एक विकेट लिए ।
त्यसअघि टस हारेर पहिला ब्याटिङ थालेको गण्डकीले निर्धारित २० ओभरमा ७ विकेट गुमाएर १९६ रन बनाएको थियो । गण्डकीका लागि सिव्रिन र करण पंगेनीले उत्कृष्ट साझेदारी गरेका थिए ।
४५ रनमा ४ विकेट गुमाएको गण्डकीका लागि सिव्रिन र करणले ८८ रनको साझेदारी गरे । करणले २७ मा ४५ र सिव्रिनले २४ मा ४५ रन बनाए । सन्दीपले ९ बलमा अविजित ३० रन जोडे ।
अर्जुन कुमाल २, मुस्कान थापामगर २१, समीर कँडेल १, दीपक डुम्रे १९ र रोहित चन्द २० रनमा आउट हुँदा अभिषेक थापा २ रनमा अविजित रहे ।
बलिङमा भुटानका थिन्ले जम्त्सोले सर्वाधिक ४ विकेट लिए । सोनाम येशेले २ र नाम्गे थिन्लेले एक विकेट लिए ।
टी–२० विश्वकपको उपक्षेत्रीय छनोटको तयारीका लागि नेपाल आएको भुटानले अब बिहीबार र शुक्रबार क्यान–११ सँग अभ्यास खेल खेल्नेछ ।
