काठमाडौँः अरनिको राजमार्गअन्तर्गत सिन्धुपाल्चोकको भोटेकोशी गाउँपालिका–२, लिपिङमा पहिरो खस्दा सडक पूर्ण रूपमा अवरुद्ध भएको छ ।
मंगलबार बिहान करिब ९ः३० बजे पहिरो खसेपछि उक्त सडकखण्डमा सवारी आवागमन रोकिएको हो । इलाका प्रहरी कार्यालय कोदारीका प्रमुख प्रहरी निरीक्षक केशव केसीका अनुसार पहिरोका कारण सडक पूर्ण रूपमा बन्द भएको छ । पहिरो हटाउने तथा सडक सञ्चालनमा ल्याउने प्रयास भइरहेको प्रहरीले जनाएको छ ।
अरनिको राजमार्ग अवरुद्ध भएपछि नेपाल–चीनबीचको प्रमुख व्यापारिक नाका तातोपानीबाट हुने आवतजावत तथा सामान ढुवानीसमेत प्रभावित भएको छ । सडक खुलाउन सम्बन्धित निकायले आवश्यक काम अघि बढाइरहेको जनाइएको छ ।
