काठमाडौं । युक्रेनको दक्षिणी जापोरिजिया क्षेत्रमा रुसी सेनाले गरेको हवाई आक्रमणमा कम्तीमा २६ जनाको मृत्यु भएको छ भने पाँच जना घाइते भएका छन्। प्रारम्भिक विवरणअनुसार घटनापछि २७ जना बेपत्ता रहेको जनाइएको छ।

जापोरिजिया क्षेत्रको कोमिशुवाखा गाउँमा भएको उक्त आक्रमणमा मानवीय सहायता वितरणका लागि प्रयोग हुँदै आएको राहत केन्द्रसमेत निशानामा परेको बताइएको छ।

युक्रेनी राष्ट्रपति भोलोडिमिर जेलेन्स्कीले घटनालाई अत्यन्तै भयावह भन्दै रुसी आक्रमणको निन्दा गरेका छन्। क्षेत्रीय प्रमुख मिखाइलो सेमिकिनका अनुसार गाउँमा कम्तीमा नौवटा हवाई बम खसालिएको थियो। तीमध्ये प्रत्येक बमको तौल करिब तीन हजार किलोग्राम रहेको बताइएको छ।

राष्ट्रपति जेलेन्स्कीका अनुसार रुसी सेनाले सुरुमा मानवीय सहायता कार्यका लागि प्रयोग भइरहेको स्थानीय विद्यालयमा आक्रमण गरेको थियो। त्यसपछि मानिसहरू ज्यान जोगाउन आश्रय लिइरहेको स्थानलाई समेत दोस्रो पटक निशाना बनाइएको थियो।

जेलेन्स्कीले सोमबार भएको आक्रमणको भिडियोसमेत सार्वजनिक गरेका छन्। भिडियोमा उद्धारकर्मीहरूले भग्नावशेष हटाउँदै जीवित व्यक्तिको खोजी गरिरहेको दृश्य देखिन्छ।

घटनाबारे रुसी सेनाले भने अहिलेसम्म सार्वजनिक रूपमा कुनै प्रतिक्रिया दिएको छैन। आक्रमणबाट भएको मानवीय क्षति र बेपत्ता व्यक्तिहरूको अवस्थाबारे थप विवरण आउन बाँकी छ।