काठमाडौं । ग्वाटेमालामा एक सांसदलाई लक्षित गरी शुक्रबार भएको सशस्त्र आक्रमणमा तीन प्रहरी अधिकृतको मृत्यु भएको छ । आक्रमणको निशानामा परेका सांसद जुलियो पोर्टिलो भने सकुशल रहेका छन् ।

स्थानीय अग्निनियन्त्रक अधिकारी बायरन भास्क्वेजका अनुसार घटना पूर्वी ग्वाटेमालाको जाकापा प्रान्तस्थित रियो होन्डो सहरमा भएको हो । लागुऔषध तस्करीका लागि परिचित जाकापा क्षेत्रमा सांसद पोर्टिलोमाथि आक्रमण भएको जनाइएको छ ।

ग्वाटेमालाको गृह मन्त्रालयले मृत्यु हुने तीनै जना राष्ट्रिय नागरिक प्रहरीका सदस्य रहेको पुष्टि गरेको छ । उनीहरूले सांसदलाई लक्षित गरी गरिएको आक्रमण विफल पारेको मन्त्रालयको भनाइ छ । आक्रमणमा संलग्न व्यक्ति भने घटनापछि फरार भएका छन् । उनीहरूको पहिचान खुल्न सकेको छैन ।

जाकापा क्षेत्रमा लागुऔषध कारोबारमा लोरेन्जाना परिवारको गिरोहको प्रभाव रहेको बताइन्छ । उक्त गिरोहको सम्बन्ध मेक्सिकोको सिनालोआ कार्टेलसँग रहेको दाबी गरिँदै आएको छ ।

सांसद पोर्टिलो सन् २०२३ मा विपक्षी दल काबलबाट निर्वाचित भएका थिए । पछि उनी पूर्वप्रथम महिला सान्ड्रा टोरेस नेतृत्वको नेसनल युनिटी अफ होप पार्टीमा प्रवेश गरेका थिए । टोरेस आगामी वर्ष हुने ग्वाटेमालाको राष्ट्रपतीय निर्वाचनमा उम्मेदवार बन्ने अपेक्षा गरिएको छ ।