काठमाडौं । पूर्वी नेपालको प्रसिद्ध धार्मिक तीर्थस्थल ताप्लेजुङस्थित पाथीभरा (मुक्कुम्लुङ) मन्दिरमा दर्शन गर्न जाने तीर्थयात्रीले यातायात, बसोबास र आधारभूत पूर्वाधारको अभावका कारण कठिनाइ भोग्नुपरेको गुनासो गरेका छन् ।

तीर्थयात्रीको चाप बढ्दा मन्दिर क्षेत्रमा होटलमा बस्ने व्यवस्था मिलाउन र सवारीसाधन पाउनसमेत समस्या हुने गरेको उनीहरूको भनाइ छ । यही अवस्थालाई ध्यानमा राख्दै मन्दिर व्यवस्थापन समितिले अग्रिम होटल बुकिङ गर्न तथा यातायात व्यवसायीसँग समन्वय गरेर मात्र यात्रा गर्न आग्रह गर्दै आएको छ ।

काठमाडौंलगायत विभिन्न स्थानबाट सडकमार्ग हुँदै ताप्लेजुङको फुङलिङसम्म पुग्न सकिन्छ । तर, फुङलिङबाट माथिल्लो क्षेत्रतर्फ जाने सडकको अवस्था कमजोर र जोखिमपूर्ण हुँदा यात्रुहरू आफ्ना सवारीसाधन छाडेर भाडाका जिपमार्फत काफ्लेपाटीसम्म पुग्न बाध्य छन् ।

यात्राका क्रममा घण्टौँसम्म सवारीसाधन पर्खनुपर्ने, यात्रुको चापअनुसार यातायात व्यवस्थापन हुन नसकेको तथा बोलेरो जिप सञ्चालनमा सीमित व्यवसायीको प्रभाव रहेको भन्दै तीर्थयात्रीले गुनासो गरेका छन् । माथिल्लो फेदी क्षेत्रमा पर्याप्त होटल तथा बासस्थान नहुँदा रात बिताउनसमेत कठिन हुने गरेको उनीहरूको भनाइ छ ।

मन्दिर पुग्ने पदमार्ग र आसपासका क्षेत्रमा खानेपानी, सार्वजनिक शौचालय, बत्ती तथा विश्रामस्थलजस्ता आधारभूत सुविधाको अभाव रहेको यात्रुहरूले बताएका छन् । उकालो–ओरालो बाटो अत्यन्तै कठिन भएकाले वृद्धवृद्धा, अशक्त तथा शारीरिक समस्या भएका भक्तजनलाई दर्शनका लागि पुग्न थप समस्या हुने गरेको छ ।

यही कठिनाइलाई मध्यनजर गर्दै काफ्लेपाटीदेखि मन्दिरसम्म करिब २.७ किलोमिटर लामो केबलकार निर्माणको प्रक्रिया अघि बढाइएको थियो । तर, धार्मिक, सांस्कृतिक तथा पर्यावरणीय विषयलाई लिएर विरोध भएपछि आयोजना विवादमा परेको छ ।

निर्माणाधीन केबलकारको काम २०८३ वैशाखमा रोकिएको थियो । विवाद समाधानका लागि सरकारले असारमा प्रधानमन्त्रीका सामाजिक विकास विज्ञ विश्व राईको संयोजकत्वमा सात सदस्यीय कार्यदल गठन गरेको थियो । तर, केबलकार निर्माणको विषयमा सहमति जुट्न नसक्दा विवाद कायमै छ । मंसिर २ गते सार्वजनिक भएको समाचारअनुसार निर्माण रोकिएकै अवस्थामा केबलकारविरोधी समूहले पुनः आन्दोलनको चेतावनी दिएको छ ।

केबलकार निर्माण अघि बढाउने वा नबढाउने भन्ने विवाद जारी रहँदा सडक स्तरोन्नति र वैकल्पिक पूर्वाधार विकासमा पनि तीर्थयात्रीले पर्याप्त ध्यान नपुगेको गुनासो गरेका छन् । उनीहरूले यातायात व्यवस्थापन सुधार, जिप सञ्चालनमा देखिएको भनिएको सिन्डिकेट अन्त्य तथा पदमार्गमा खानेपानी, शौचालय र विश्रामस्थलको व्यवस्था गर्न सम्बन्धित निकायसँग माग गरेका छन् ।

विशेषगरी वृद्धवृद्धा र अशक्त भक्तजनले सहज रूपमा दर्शन गर्न पाउने व्यवस्था मिलाउन सरकार तथा सरोकारवाला निकायले तत्काल पहल गर्नुपर्ने उनीहरूको जोड छ ।

50% LikesVS
50% Dislikes

प्रतिक्रिया

सम्बन्धित खवर

ताजा समाचार

लोकप्रिय