महोत्तरी । महोत्तरीको गौशाला नगरपालिका–१, सानो कुशमाडीस्थित उखुबारीमा एक महिलाको शव फेला परेको छ ।
शुक्रबार बिहान स्थानीय ६५ वर्षीया विणामाया पुलामीको शव फेला परेको इलाका प्रहरी कार्यालय गौशालाका प्रहरी निरीक्षक मधुसुदन विश्वकर्माले जानकारी दिए ।
प्रहरीका अनुसार पुलामी बिहीबार घाँस काट्न घरबाट निस्किएकी थिइन् । तर, उनी शुक्रबार बिहान मृत अवस्थामा फेला परेकी हुन् ।
शवको प्रारम्भिक अवस्था हेर्दा घाँटीमा गम्छा कसिएको जस्तो देखिएकाले हत्या भएको हुन सक्ने प्रहरीको आशंका छ । घटनाबारे अनुसन्धान गर्न तालिम प्राप्त कुकुरसमेत परिचालन गरिएको प्रहरीले जनाएको छ ।
घटनाको वास्तविक कारण र संलग्न व्यक्तिबारे खुल्न बाँकी रहेको प्रहरीले जनाएको छ ।








