श्रोत; ratopati
काठमाडौँ । मंसिर १६ गते हुने स्थानीय तह उपनिर्वाचन अन्तर्गत कीर्तिपुर नगरपालिकाको प्रमुखमा नेपाली कांग्रेस, नेकपा एमाले र नेकपा माओवादी केन्द्रबिच कडा प्रतिस्पर्धा हुने सङ्केत देखिएको छ ।

कीर्तिपुर नगरपालिका प्रमुख पदमा कांग्रेसबाट नगर समितिका सभापति कृष्णमान डंगोल, एमालेबाट केन्द्रीय सदस्य एवं निर्वाचन क्षेत्र नम्बर १० का अध्यक्ष डा. सुरेन्द्र मानन्धर र माओवादीबाट प्राडा. शिवशरण महर्जन उम्मेदवार छन् । तीन जनामध्ये मानन्धर ३ नम्बर वडाका बासिन्दा हुन् । महर्जन वडा नम्बर १० र डंगोल वडा नम्बर २ का बासिन्दा हुन् ।

यसपटक प्रमुख तीन दलले नै राम्रा र क्षमतावान व्यक्तिलाई उम्मेदवार बनाएकाले कडा प्रतिस्पर्धा हुनसक्ने स्थानीयवासी बताउँछन् । यद्यपि एमालेका उम्मेदवार मानन्धरको उपस्थिति कांग्रेसका लागि महँगो पर्न सक्ने उनीहरूको बुझाइ छ ।

२०७९ को निर्वाचनमा तेस्रो स्थानमा रहेको माओवादीका उम्मेदवार प्राडा. शिवशरण महर्जनले समेत उल्लेख्य मत बढाउन सक्ने अनुमान गरिएको छ । यसैगरी स्वतन्त्र उम्मेदवारहरू नवरथकुमार बानिया, राजमान महर्जन, कविकुमार महर्जन, दिनेशकुमार अधिकारी लगायतको उपस्थितिले चुनावी प्रतिस्पर्धा कडा र रोचक हुन सक्ने स्थानीय त्रिविन बस्नेतको बुझाइ छ ।

‘अघिल्लो निर्वाचनको तुलनामा योपटक यहाँको निर्वाचन कडा प्रतिस्पर्धा हुन सक्ने देखिएको छ । कांग्रेस, एमाले, माओवादीले मात्रै होइन, सबैले राम्रा उम्मेदवार उठाएका छन् । कीर्तिपुर विगतमा एमालेको बलियो क्षेत्र हो’, आइतबार रातोपाटीसँग उनले भने, ‘योपटक विरासत फर्काउनका लागि हाइप्रोफाइलका व्यक्तिलाई मैदानमा ल्याएको छ । माओवादीको उम्मेदवार पनि राम्रो भएकाले उसले केही मत बढाउन सक्छ । कांग्रेसको उम्मेदवार पनि राम्रै छन् । त्यसैले योपटक दलहरूबिच कडा प्रतिस्पर्धा हुने देखिन्छ ।’ जसले जिते पनि थोरै मतान्तरले जित्ने उनको अनुमान छ ।

२०७९ को स्थानीय तह निर्वाचनमा एमालेको गढ भत्काउँदै कांग्रेसका उम्मेदवार राजकुमार नकर्मी निर्वाचित भएका थिए । नकर्मी ९०४३ मत ल्याएर विजयी हुँदा उनका निकटतम प्रतिद्वन्द्वी एमालेका उम्मेदवार केशवरत्न बज्राचार्यले ५५०७ मत प्राप्त गरेका थिए । तेस्रो स्थानमा नेकपा माओवादी केन्द्रका उम्मेदवार प्रा.डा.शिवशरण महर्जनले ४०९० मत पाएका थिए ।

अघिल्लो निर्वाचनमा एमाले पार्टी विभाजनको फाइदा कांग्रेसले उठाएको एमालेका नेताहरूको भनाइ छ । त्यतिबेला नेकपा एकीकृत समाजवादीले वटुककृष्ण थापालाई प्रमुख पदमा उम्मेदवार बनाएको थियो । तर उनले जम्मा ११५३ मत पाए । योपटक थापासहित एकीकृत समाजवादीबाट ठुलो समूह एमालेमै फर्किएकाले मानन्धरलाई राहत मिलेको स्थानीय तीर्थ बस्नेतको विश्लेषण छ । मानन्धर आफैँ माधव पक्षधरका नेता भएकाले उनी बलियो प्रतिस्पर्धी रहेको बस्नेतले बताए ।

‘मानन्धर तत्कालीन एमालेमा माधव नेपाल निकट भनेर चिनिन्छन् । त्यतिबेला कीर्तिपुरमा उनको बलियो पकड थियो । अघिल्लो निर्वाचनमा केपी ओली पक्षका लो प्रोफाइलका नेतालाई उठाउँदा एमालेका उम्मेदवार पराजित भयो कि जस्तो लाग्छ । एमालेको गढ मानिएको कीर्तिपुरमा एमाले विभाजन भएको फाइदा ०७९ मा कांग्रेसले उठायो । योपटक मानन्धरलाई उठाएकाले कडा प्रतिस्पर्धा हुने देखिन्छ’, उनले भने ।