अमृत खनाल,
जीवनका हरेक पाइलामा चुनौतीहरू आउँछन्, र यी चुनौतीहरूले मानिसलाई मानसिक, शारीरिक र भावनात्मक रूपमा प्रभावित गर्छन्। विशेष गरी पुरुषहरूलाई समाजले जिम्मेवारी उठाउने व्यक्ति र समस्यामुक्त व्यक्तित्वका रूपमा हेर्ने भएकाले, उनीहरू आफ्नो वास्तविक भावना व्यक्त गर्न सक्दैनन्। यसले उनीहरूको तनाव झन् गहिरो बनाउँछ।
पुरुषहरुको तनाबको प्रमुख कारणहरु,
आर्थिक दबाब , करियर र प्रतिस्पर्धा , पारिवारिक र समाजको अपेक्षा , मानसिक स्वास्थ्यप्रति बेवास्ता ।

१. आर्थिक दबाब
पुरुषहरूले प्रायः आफ्नो परिवारको मुख्य आर्थिक भार बहन गर्नुपर्छ। घरपरिवारको खर्च व्यवस्थापन, ऋण तिर्ने चिन्ता, र भविष्यको लागि बचत गर्ने चुनौतीले उनीहरूलाई मानसिक रूपमा कमजोर बनाउन सक्छ।

२. करियर र प्रतिस्पर्धा
रोजगारीमा स्थायित्वको अभाव, कामको ठूला अपेक्षा, र व्यावसायिक असफलताले पुरुषहरूलाई ठूलो मानसिक दबाबमा पार्छ। उनीहरू आफ्नो पहिचान र आत्मसम्मान गुम्न सक्ने डरले निरन्तर दबाबमा रहन्छन्।

३. पारिवारिक र सामाजिक अपेक्षा
पुरुषहरूलाई ‘आदर्श पति’, ‘आदर्श छोरा’, वा ‘आदर्श बाबु’ बन्नुपर्ने दबाब हुन्छ। परिवारको हरेक निर्णयमा उनीहरूको भूमिकालाई महत्त्व दिइन्छ, तर यसले उनीहरूको व्यक्तिगत भावना र आवश्यकता ओझेलमा पार्छ।

४. मानसिक स्वास्थ्यप्रति बेवास्ता
पुरुषहरूले प्रायः आफ्नो भावना लुकाउने र एक्लै समाधान खोज्ने प्रयास गर्छन्। समाजको ‘पुरुष रोदैन’ भन्ने मान्यताले उनीहरूलाई मद्दत माग्न अप्ठ्यारो बनाउँछ।

तनावले हामिजस्तै पुरुषपार्ने प्रभावहरू

पुरुषहरूको तनावले उनीहरूको जीवनका हरेक पक्षमा गहिरो प्रभाव पार्छ।

१. शारीरिक प्रभाव
तनावले उच्च रक्तचाप, मुटुको समस्या, अनिद्रा, र थकान जस्ता शारीरिक समस्या निम्त्याउँछ।

२. मानसिक प्रभाव
चिन्ता, डिप्रेसन, चिडचिडापन, र आत्मसम्मानको कमी पुरुषहरूको मानसिक स्वास्थ्यमा गम्भीर प्रभाव पार्छ। लामो समयसम्म तनावमा रहँदा आत्मघाती सोचसमेत विकसित हुन सक्छ।

३. सम्बन्धमा असर
तनावका कारण पुरुषहरू आफन्त र साथीहरूसँगको सम्बन्धमा टाढिन सक्छन्। आफ्ना भावना व्यक्त गर्न नसक्दा उनीहरूको सम्बन्ध बिग्रिन सक्छ।

तर पुरुषहरूको जीवनमा तनाव सामान्य भए पनि यसलाई गम्भीर रूपमा लिइनुपर्छ। समयमै समस्या पहिचान गरी समाधान खोज्नु, आफ्नो भावना लुकाउनुको सट्टा व्यक्त गर्नु, र सहयोग लिन हिचकिचाउन नहुनेजस्ता उपायहरूले पुरुषहरूको जीवनलाई सहज बनाउन सक्छ। अन्ततः, जीवनका जिम्मेवारीहरूसँगै आफ्नो मानसिक र शारीरिक स्वास्थ्यलाई प्राथमिकता दिनु नै सुखी जीवनको मूल आधार हो ।